Tera wszyndzi
ekologijo to niy tak jak downi było
somsiod poloł
guminioki abo łopony aż miło
starka wrzeszczeli
ze dworu żeby przestoł tak hajcować
bo pszeca łod
tego smrodu niy idzie sie nikaj skować
A na dachu już
fojera sadze hajcły sie w kuminie
jak przijadom
fojermany wielko sztrofa go niy minie
dzisioj momy insze
czasy ludzie na gaz sie przeciepli
dostowajom
dotacyje kopciuch na hasiok wyciepli
A i tak tyn smog
szkaradny wcisko sie do kożdej szpary
człowiek dusi sie
i kuco czy to mody czy tyż stary
trza zawiyrać
łokna dżwiyrze na dworze strzimać niy idzie
ludzie sie
pochorowali i co s nami dali bydzie
S czego to sie
biere dzisioj wto ta sprawa wyklaruje
żodyn niy chce
pedzieć prowdy co nom jeszcze sie wykluje
za wonglym srogi
kolejki gruby pszeca likwidujom
niby tako ekologjo
a ludzie dali smrod czujom
Możno pomoże
maseczka a niy jakiś drogi lyki
yno kaj kupić jom
łacni w sklepie czy iś do Aptyki
potym założyć
na gymba somsiadka mi doradziła
yno bez tyn cały
covid jo zestresowano była
A żech chciała
być gryfniejszo zamias maski do noszynio
co przed smogiym
chroni pluca kupiłach do nałożynio
leżałach s niom
poł godziny bez ruchu jak jakoś kłoda
jak dopiyro
zrozumiałach że na nic mi ta uroda
Bo mi wcale niy
pomogła i nauczka byda miała
że to maska i to
maska a jo kucom jak kucałach
dochtor pedzioł
że to minie yno mi trza tela wiedzieć
stosować sie do
zalecyń jak trza bydzie w chałupie siedzieć
Jak sie rozchodzi
ło tyn smog co grasuje chocioż myni
możno bez ta
ekologjo to na lepsze sie łodmiyni
a tyn covid gizd
pieroński pszeca w końcu nom łodpuści
a jak bydymy we
maskach kosa śmiertce tyż zaruści
Regina Sobik 22.01.2022r.
