Kedy rajzujesz nieznanom drogom

 

                               

Chciała kozica iś w świat daleki

łobejrzeć morza jeziora rzyki

kej łopowoga łod dycko miała

to łod małego ło tym myślała

Ruszyła w rajza s samego rana

toż wziyna miyszek suchego siana

i rada ze sia na miedza skoczy

to stanie kwila tu zaś podskoczy

Tu szkubnie trowa wodom popije

i myśli że tera to łona żyje

po co ji miyszek s sianym na grzbiycie

darymny ciynżor ji ciało gniecie

„Siano jym jyno s przizwyczajynio

toż go wyciepna mom w brod jedzynio”

zapobiegliwom choć ponoć była

to miyszek s sianym kajścik straciła

Pora miesiyncy tak rajzowała

latym jedzyni i pici miała

a tera chłodno zima za pasym

łoj bydzie głodym przimiyrać czasym

Że roztrzepano to zapomniała

nauki kiero ji mama dała

„Kedy rajzujesz niyznanom drogom

choć mały forant noś dycko ze sobom”

 Regina Sobik 

                                               

        Jak to Francik zrobioł porzondek na cudzym grobie

Szoł 1 Listopad dziyń pamiynci ło Tych co już łodeszli łod nas. Mały Francik radowoł sie, że pudzie s Łojcami na grob swojigo starzika zapolić świyczka. Jak yno usłyszoł łod starki, że tak sie robi i że to je znak pamiynci dlo Tych co już niy som s nami to sie tak zawzion, że musi iś choćby niy wiym co sie dzioło. Co prowda niy pamiynto starzika ale wiela ło nim słyszoł łod swoji mamulki. Niy umioł już sie doczakać tego dnia. Boł koniec października a, że dziyń boł piykny i słoneczny mamulka wziyna se wolne we robocie, żeby iś na grob swojigo łojca a starzika Francika .-Trza zrobić jakiś porzondek na Dziyń Wszystkich Świyntych pedziała do starki.- Przeca niy może być tak, żeby grob niy boł umyty i niy wyglancowany.Francik poszoł s niom.Wziyni ze sobom do mycio, wiaderko jakiś szmaty, szczotka, zmiatek, dwie wielki flaszki ciepłej wody, mietełka, grabki trzi lampki i kołki, żeby zapolić te lampki. Jak yno przijechali autym pod kiyrchow zarozki poszli na grob starzika. Mamulka wziyna sie za porzondki a syn ji pomogoł jak yno umioł. Mama grabiła suche liści na kupka a Francik zbiyroł do torbki kiero potym nosioł do taki wielki krzini .Potym wziyna sie za myci grobu. Francik s poczontku pomogoł ji ale uznoł, że to babsko robota toż hnet mu sie to zmierzło. Za to bez przerwy citowoł na zapuszczony wele grob. Podeszoł do niego łodgarnoł liści na płycie kiero była fest zniszczono.-Mamo a wto tu leży możesz mi pedzieć spytoł sie mamy.- Jakiś cudzy poczekej zaroz łobejrza .Mama przerwała myci i podeszła do cudzego grobu .-Widzisz synku pisze po nimiecku niy umia za bardzo łodczytać, napis je trocha zniszczony. Możno to jaki wojok kieryn pod w czasie wojny i tu go pochowali pedziała mama i poszła do swoji roboty.-co za borok niy mo żodnego co by mu zapoloł świyczka pomyśloł Franek i wzion sie do roboty..Zaczon zbiyrać suche liści do torbki potym wzion zmiatek i fajnie pozamiatoł nagrobno płyta. Byłoby wszystko dobrze yno trza by jeszcze trocha jakoś tyn grob przistrojić. Wpod na pomys, żeby s suchych liści zrobić pukiet. Wzion krałza kiero leżała wele wsadzioł do ni pukiet i postawioł na grobie.- Mamulko łobejrzi czy tak może być spytoł sie matki. Matka zajynto sranianiym niy dała pozor, że ji mały synek posranioł grob cudzego człowieka. Kiedy sie łobejrzała niy mogła uwierzyć-No niy! nigdych niy wiedziała, że moj mały synek je taki robotny. Franciku wyrośniesz na dobrego człowieka pedziała mama i pogłoskała Francika po gowie.-Wiysz co wziynach ze sobom pora lampek toż zapolymy jedna bo kożdymu człowiekowi noleży sie zoca i pamiyńć pedziała.-Mamo jak bydymy przichodzić na grob łod starzika to dycko też zajrzymy na tyn bo jo myśla, że tyn cudzy wojok co tu leży ni mo nikogo co by zajon sie grobym abo familijo niy wiy, że tukej leży abo majom za daleko pedził Francik.-Mosz recht synku łodpedziała mamulka a była łokropnie rada, że ji synek chocioż jeszcze taki mały a już taki mondry i moge zagańbić niejednego starszego.

Regina Sobik  

Dziwno ryba

                                 

                 

                                                   

                                 Stracioł s pyska zomb rekinek

bez cufal s samego przodka

a jego mama sie boji

że ji bajtel umrze s głodu

 

Myśli jak łon bydzie łowioł

co bydzie jod na śniodanie

pszeca za pora dni s niego

jyno som szkielet łostanie

Toż poszła s nim do dochtora

by na utropa poradzioł

prosi błago i lamynci

by mu zomb do szczynki wsadzioł

Dochtor zdziwioł sie i godo

tu sie ni ma czym frasować

bo skuli jednego zymba

pszeca niy musi głodować

Co sie zaś tyczy rekina

niech mamulka sie niy boji

bo tyn bez colutki życi

som wymiynio zymby swoji 

Regina Sobik  

Haja

                           

Na rygale butel wielki

s chlebym wadzom sie precelki

że to wcale niy pasuje

i jyno jim wyglond psuje

Skoro łone nojważniejsze

i do tego nojsmaczniejsze

to żymły somsiadki chleba

do kupy kajś przeniyś trzeba

Żymły na to rozciepane

niy som żeście tukej same

my wyciepać sie niy domy

prawo leżeć tukej momy

Na to rogol sie łodzywo

pszeca jo też je pieczywo

toż was prosza moji mili

żebycie sie niy wadzili

Już ci piekorz dobrze wiedzioł

wto kaj i jak bydzie leżoł

czy to żymły czy precelki

chlyb rogol czy tyż eklerki

Skoro kożde do zjedzynio

po co nom te biadolyni

nikomu to niy pomoge

a nas jyno skłocić moge 

Regina Sobik 

Dziwno ryba

 

                             

Stracioł s pyska zomb rekinek

bez cufal s samego przodu

a jego mama sie boji

że ji bajtel umrze s głodu

Myśli jak łon bydzie łowioł

co bydzie jod na śniodani

pszeca za pora dni s niego

jyno som szkielet łostanie

Toż poszła s nim do dochtora

by na utropa poradzioł

prosi błago i lamynci

by mu zomb do szczynki wsadzioł

Dochtor zdziwioł sie i godo

tu sie ni ma czym frasować

bo skuli jednego zymba

pszeca niy musi głodować

Co sie zaś tyczy rekina

niech mamulka sie niy boji

bo tyn bez colutki życi

som wymiynio zymby swoji 

Regina Sobik  

Leśno Olimpiada

 

     

Bal bezmała je łokrongły

Bal bez mała je łokrongły

bramki tyż som yno dwie

mecz boł piykny ale nasi

troszyczka sfifrali sie

Nawet doping im niy pomog

choć trza prziznać źle niy było

szkoda yno że marzyni

ło finale nom sie zmyło

Chocioż synki no niy powiym

możno wiela s sibie dali

trza posypać gowa hasiym

Czechy troszka lepi grali

Ni ma spoko dlo Polokow

euro dali bez nas bydzie

na a tera łobejrzymy

komu kibicować przidzie

Ale jak to w życiu bywo

wszyndy troszka szczyńścio trzeba

a gra w fusbal moji mili

to ciynżki konszczyczek chleba

Regina Sobik

Ło kozach ze Pacanowa

 

                               

W jednym mieście Pacanowie

nim zaprzyngli jom do woza

stanyła w dźwiyrzach wczas rano

rajzom fest zmochano koza

Kajś łu ludzi podsłuchała

że Pacanow s tego słynie

że to miasto je kowoli

najmondrzejszych w cołki Gminie

Ponoć tukej kozy kujom

rozmańtych sortow i maści

grzych s łokazje niy skorzystać

darymnie  jom zaprzepaścić

Koza niy była mamlaskom

toż na dźwiyrze głośno klupie

prosza mje podkuć a gibko

jak niy .... popamiyntosz strupie 

Kowol wzion sie do roboty

szuko podkowek na miara

podkuł koza rajzowniczka

i jeszcze koz inszych pora

Chcecie wierzcie abo i niy

że boł w tej kupie koziołek

co najmłodszym boł klijyntym

a mianowoł sie Matołek

To łon pszeca tym Matołek

chocioż wtedy jeszcze mały

rajzom by podkuć se szłapki

rozsławioł Pacanow cały

 

A tu jeszcze wom dopowiym

chocioż możno to i bojka

na grzbiycie naszego kozła

rajzowała pchła Chichrojka

A że rajza była ciynżko

wartko przeszła ji łochota

toż uciykła do somsiada

na futro perskigo kota

Regina Sobik