\Wele Betlejym w drzewianej szopie
miyszkoł s inszymi łosiołek mały
trocha gańbliwy i niepozorny
możno zadziwi kiedyś świat cały
Tak jak i insi mioł tyż marzynia
chcioł by to wszyjscy go mieli w zocy
nie widzioł jeszcze jak bydzie ciynżko
i wiele musi dać ze sia procy
Dzisioj nauczy sie piyknie lotać
pofurgnie s gory co widać dali
przi piyrszeym razie tak fest sie łobioł
że wrocioł nazot cołki zbolały
-Coż niy mom szczyńscio nie byda w zocy
lamynci łosioł aż puchnie gowa
teraz to musza łostać śpiywokiym
trza mi sprugować jutro łod nowa
Tak jak i przed tym łosioł sie sfifroł
kej zamias śpiywać ryczoł łokropnie
- Widać śpiwanie nie do mje pszeca
ryknoł i legnoł plackiym we szopie
Zmochany i zły nie wiedzieć kedy
zasnoł nasz łosioł na miynkim sianie
jak sie łobudzioł łotwiyro ślypia
niy wierzy łuszom bo słyszy grani
-Coż to sie robi ludkowie złoci
malućki bajtlik leży we żłobie
wele pastuszki ze geszynkami
Janioły i jacyś cudzi Krolowie
To Ci dopiyro zoca nad zoce
coż widać ,że mje niy je pisano
niy byda gorszy łod Tych Panoczkow
niy zgrzesza jak zegna przed nim kolano
Możno to i mje kapnie coś s tego
a bajtlik sie sy mnom kapka podzieli
ponoć mo łostać krolym nad krole
toż i mje w zocy tyż bydom mieli
Jeszcze nie zdonżoł łosioł rozmyślać
jak doszły s miasta straszliwe wieści
łoszkliwy Herod chce zabić bajtla
a to już sie we łbie łoślim niy mieści
-Musza coś zrobić żeby jim pomoc
po darymnicy niy byda siedzioł
wezna na grzbiyt swoj mamulka s bajtlym
tak żeby Herod sie niy dowiedzioł
Niy wiedzioł borok że to Ponboczek
doł Józefkowi znać bez Janioła
żeby tyn wartko wyruszoł w rajza
chocioż Maryjka troszka sie boła
-Józefku Myryjko nie tropcie że sie
życi ważniejsze uciekać trzeba
ładuj a wartko te twoji skarby
kej tako pszeca je wolo nieba
I ruszoł w rajza łosioł bez miasta
bez wsie kamiynie skały i pioski
bo pojon że pomoc potrza kożdymu
a to tyż talynt tela że boski
Regina Sobik
foto ze str https://www.tapetus.pl/79114,osiolek-gwiazda-ludzie-betlejemska.php
Brak komentarzy:
Prześlij komentarz