Przeszło latek pora doros Jankowiczek mondrzejszy na nowe wyzwania gotowy
poszoł do Urzyndu i wytrzeszczo gały bo zamias starego stoji Urzond nowy
Chcioł załatwić jyno jakoś ważno sprawa trocha musioł czakać bo boł to dziyń fany
nasuchoł sie wiela co tam w Gminie piszczy potym poszoł dali w strona autobany
A że do Galerje śpiychoł sie boroczek łobejrzoł jom jyno ze mostu w Świyrklanach
bo sie wrocić musioł na próba pieśniczek tych co „Karolinki” ćwiczyły łod rana
Jadom kajś na przeglond choć niy wiedzom jeszcze co to dali bydzie bo wszyjscy godajom
ło jakiś wirusie na kieryn dochtoryzocni i fest mondrzi a lyku niy majom
Zawarli kościoły szkoły i galerje i maski na gymba nałożyć kozali
gospodynie ze Koł szyjom jich za darmo by ji mogli nosić i starzi i mali
Maseczki na gymba i płyny na rynce trza było używać bez cołki dwa lata
toż i Jankowiczek dboł ło swoji zdrowi żeby wirus niy boł tu do końca świata
Ponoć jakiś COVID a niech go szlag trefi żeby coś gorszego jeszcze nom niy skludzioł
wzion nom ludkow wiela toż kożdy już rzykoł żeby jak nojpryndzy łod nas sie wykludzioł
A kedy sie wszystko już unormowało to i jo tak jakby na nowo łodżołech
chciołech sie zapisać „do Klubu Syniora” ale mje niy chcieli bo za mody bołech
No i coch mioł robić yno siedzieć doma toż żech do Galerje co kwila zaglondoł
niy byda Wom godoł że fest sie zmiyniła no bo już Holesza niy byda łoglondoł
Piyrwej ta Galerjo w zocy wszystkim była i niy szło policzyć kej łobrazow tela
dzisioj no niy powiym yno wernisaże możno za niedugo tyż ich bydzie wiela
U tych co tradycjo je na piyrszym placu a do takich pszeca rod skrzaci noleży
myślom ło fajerach s naszom ślonskom godkom trza ich prziszykować tak jak sie noleży
Możno tyż w gościna Górale przijadom bydom czytać godać i to po swojimu
a że som już tukej praje jak pszociele trza jich tyż nauczyć trocha po naszymu
A co sie zaś tyczy tej naszej gościny dzisio jeszcze skocza do Żor do Rebusa
tam promocjo książki no i przedstawiyni je żech zaproszny toż skorzystać musza
Bo trza Wom tu wiedzieć że kejś „U Danusi”w gościna przijechoł żorski „Zespoł Sari”
potym na szpilplacu boł jakiś festiwal tam ze Hiszpanami piyknie tańcowali
Coż wroca sie nazod do szkoł i przedszkolo kaj yno po kontach cichota miyszkała
tera jak sie zacznom lekcje po nowymu to wielko uciecha bydzie dziatwa miała
Ponoć już niy bydzie jak to przed pandymjom bo doszły nas słuchy i jakiś złe wieści
zaro za granicom zaczyna sie wojna a tam jak padajom żodyn sie niy pieści
I jeszcze inflacjo dopadła nas tera cyny jak s miesionczka kaj yno sie rusza
ciynżko żyć s geltaku modym na dorobku ale i jo tyż coś prziszporować musza
Niy byda lamyncioł ślomtoł ani staroł bo jak bydzie zgoda możno wszystko minie
toż Wom powiym ludki do jednego łucha że dobrze sie żyje skrzatom w naszej Gminie
Regina Sobik
Brak komentarzy:
Prześlij komentarz