CHCA SIE WROCIĆ DO GALILEJE
Wiela to upadkow wiela potkniyńć było
a wiela powrotow zliczyć ich ni moga
kiedy krziż przigniecie ciynżorym istniynio
wybiyrom ta prostszo i lekciejszo droga
Tak ciynżko mi pojonć tajymnica mynki
kiej to niy mje rani ciyrniowo korona
szukom taki miary co wina łodmierzy
kiej ludzkim pojynciym duma urażono
Kiedy moji serce łogarnie lynk srogi
że to Ty łofiarom grzychu i słabości
zaczynom kapować czym ukrziżowani
skompany w dobroci i Twoji zocności
I już wiym że krziż moj dźwigosz sy mnom Chryste
wiym czym Łodkupiyni i czym Zmartwywstani
kej dycko mi pszajesz chca sie wrócić nazot
tam do Galileje by być s Tobom Panie
Regina Sobik
wiersz ten otrzymał 3 nagrodę w konkursie poezji religijnej Ludźmierz 2014r w kat gwarowej
Brak komentarzy:
Prześlij komentarz