Jesiyń łobleczono we szaty utkane s
kolorowych liści i czerwono bronotnej zopaski zaklupała do
dźwiyrzi pałacu kaj miyszkało Lato .Na gowie zamias korony miała
winiec ze żołtych słonecznikow a na karku szal s czarwonych jabek.
Wyglondała przecudnie. Na ji powitani wyszoł som Wrzesiyń kej jego
bracio Październik i Listopad jeszcze spali we swojich izbach .
Wrzesiyń kiedy jyno ujrzoł Paniczka Jesiyń łośmioł sie bo
wiedzioł ,że ta niy prziszła do pałacu s pustymi rynkami . Kontym
łoka widzioł ,że coś kryje pod zopaskom yno niy wiedzioł co też
to może być .Jeszcze niy zdonrzoł sie porzondnie prziwitać s
gościym jak we progu komnaty zjawiło sie Lato s małym kuferkiym
.We rynkach trzimało berło i piykny wonioncy pukiet kwiotkow i
zioł. Tyn pukiet boł na prziwitani swoji siostry Jesiyni kiero
miała łobjonć łod tego dnia rzondy we pałacu. Lato fest sie
śpiychało bo za trzi miesionce miało być we Australji a droga
była daleko i ciynżko toż wartko dało Jesiyni to co miało dać i
poleciało za morza i oceany. Paniczka Jesiyń wesoło wlazła do
pałacowej izby. Wrzesiyń zaś dwojoł sie i trojoł ,żeby pokozać
swoji Pani rozmańte zakamarki i pałacowe pywnice .Szło ło miejsca
kiere prziszykowoł na geszynki prziniesione bez Jesiyń. Paniczka
Jesiyń łokropnie rada s tego co uwidziała pado : dziynkuja Ci mój
kamracie widza ,że niy marnowołeś po darymnie czasu a tera mje
zakludź do mojich poddanych jyno piyrw łobudź swojich braciszkow.
Wrześniowi nie trza było dwa razy godać uwinoł sie wartko i
ruszyli w droga. Na pobliski miedzy trefili Babi Lato kere to
czakajonc na swoja Krolowo markotno łaziło po polach i lasach.
Łojejku!! kogo jo widza a już myślołech ,że sie niy doczekom
zawołało .Krolowa idzie połoglondać swoji gospodarstwo . Jesiyń
łokropnie rada s takigo prziwitanio piyrw poszła na pola i łonki
,żeby prziwachować robota ludzi. Jedni s nich krzontali sie
zbiyrajonc ćwikla i zimioki s pola insi zaś zbiyrali resztki
suszonej trowy na pasza do gowiedzi. Widzonc,że robota idzie tu
wartko Jesiyń w asyście Września poszła do zegrody i sadu ,żeby
łobejrzeć jak tam sie majom sprawy .I tu tak jak na polach robota
była zrobiono na medal. Starsi srywali owoce ze stromow a młodsi
ukłodali jich do skrzinek .Te najmłodsze bajtle ukłodały jabka do
koszykow .Potym chłopy nosili te koszyki do pywnicy abo ukłodali w
kopce. Na te kopce kładli słoma i ziymia i fest ubijali potym zaś
słoma i ziymia a to wszystko po to ,żeby jak przidzie zima niy
przemarzły. Tak tyż robili ze zimiokami i inszymi jarzinami.
Ładowano tyż te owoce i jarziny na taki dziwne auta i potym wiyźli
jich do chłodnie do miasta kaj miały se bezpiecznie doleżeć do
wiosny. -Bydom witaminy na zima zawołoł Wrzesiyń s wielki uciechy
a ludzie i cołko gowiydź ni bydzie głodować dodoł . Ni stond ni
s owont jak wiater pojawioł sie tukej Październik .Podziwoł sie na
swojigo brata Września i we te pyndy polecioł do lasa pomogać
zwierzontkom zrobić zapasy zimowe .Jesiyń łokropnie rada kozała
trzonś astami stromow i to tak ,że wszystko co tam rosło spadło
na ziymia . Pażdziernik boł ucieszony s tej roboty a pomogoł mu w
tym ciepły jeszcze jak na ta pora roku wiater kieryn szarpoł astami
stromow tak ,że wszystki liści ,dybionki, kasztany i łorzechy
spadywały na ziymia jak płaczki deszczu. Leśne zwierzontka miały
ułatwiono robota .Uwijały się przi tym jak mogły ,żeby pozbiyrać
te wszystki geszynki Jesiyni a potym przeniyś ji do swojich nor i
dziplow. Fest sie narobiły ale jim sie to łopłaciło jak nigdy bo
bez zima niy bydom głodować. Na pobliskich polach ludzie kończyli
orka sioli zboża ,żeby te mogły jeszcze wykiełkować nim przidom
mrozy .Paniczka Jesiyń miała w zocy robota jako wykonywali toż
podarowała ludziom i całej gowiedzi jeszcze pora ciepłych i
słonecznych dni .Za pora dni mioł być Listopad a tyn jak wiadomo
je rozmańty roz ciepły roz zimny .Roz świyci słońcym a roz pado
zimnym deszczym a i sypnie i potrzimie śniegiym i mrozym .Jak wiycie
taki czas je niezdrowy .Tak to już je s tom pogodom a Jesiyń ło
tym dobrze wiy bo to niy wto inszy yno Listopad zrobioł jom za bozn,
Po ciepłym i słonecznym dniu spod na ziymia płaczkami dyszczu a
potym śniega. Co gorsze postraszoł tyż wszystkich niewielkim
mrozym. Paniczka Jesiyń przeziymbiono wrociła sie do szkolnej
komnaty kaj zaprosiły jom szkolorze na wystawa ludzikow zrobionych s
kasztanow i dybionkow nazbiyranych we pobliskim parku. Wystawa była
naprowda piykno. Wszyjscy mieli we zocy robota szkolorzy bo ci tyż
,żeby było przijymni zrobili s kolorowych liści pukiety .
Przeziymbiono Jesiyń siadła se w koncie na ryczce s daleka ,żeby
nikogo niy zarazić. Widać tyn szpacyr i kawał kieryn zrobioł ji
Listopad fest ji zaszkodzioł toż poprosiła Panie kucharki ło
szolka ciepłego tyju s citrynom . Jak trocha doszła do sia to
porozprowiała bajtlom ło tym jak majom sie łoblykać jak je zima i
padze dyszcz. Pszeca bez szlika i czopki niy wylazuje sie s chałupy
.Trza łoblykać ciepłe kurtki abo peleriny przeciwdeszczowe a na
nogi ciepłe szczewiki a jak je chlapa to śniegowce. Inacy sie
bajtle rozchorujom a jak już do tego dondzie to majom siongnonć po
geszynki kiere prziniosła ze sobom lipa, miod ,maliny i jabka no i
citryny. Te łostatni co prowda niy rosnom u nas ale przywożom ji
szifami s dalekich ciepłych krajow. Jak by to niy pomogło to trza
iś do dochtora a tyn zapisze jim jakiś skuteczniejsze lyki .No ale
na mur -beton łożko jich niy mini bo gripa trza wyleżeć ,żeby
niy zarażać inszych i jeszcze bardzi sie rozchorować . Po tym
wszystkim Paniczka Jesiyń poszło do swoji izby żeby trocha
dychnonć i prziszykować sie na prziwitani swoji siostry Zimy .
Wrzesiyń jak i Pażdziernik tyż niy czakali dłuży i zmochani
zawrzyli sie u siebie we izbie a to po to ,żeby jich żodyn niy
szterowoł . Łostatni s braci Listopad jeszcze lotoł s wiatrym po
dworze , tańcowoł s astami i straszoł roz to ciepłym roz chłodym
.Wiedzioł ,że już mu niy łostwło wiela czasu bo za pora dni mioł
prziś Grudziyń a za nim Królowa Zima .
Regina Sobik
Brak komentarzy:
Prześlij komentarz