Ło wojoku kierego nie tykały sie kulki

Wojoki . Mogłabych tu wiela naszkryflać abo ło mojim synku keryn boł we czołgistach abo ło mojim tatulku kieryn co prowda boł we wojsku we drugo wojna światowo yno pora miesiyncy Łostoł postrzelony we łokieć toż posłali Go do chałupy .We dokumyntach naszkryflali że je inwalida . Moga jeszcze naszkryflać ło mojim starziku kieryn bioł się we powstaniach ślonskich i doszoł aż na Góra św.Any. Przeca powstańce to tyż wojoki pra. A jo na sprzyk naszkryflom ło inszym wojoku mojim ujku kerego wziyni do Wermachtu a ło kierym rozprowiała mi moja starka.Wtoś wto to bydzie czytoł może podniyś larmo że to wielko gańba ,że Ślonzocy byli we niymieckim wojsku i ni możymy ło tym spominać a co dopiyro szkryflać. Podług mje miejsca swojigo urodzynio sie nie wybiyro. Tu na Ślonsku bez drugo wojna jak yno synek mioł swoji lata brali go do wojska do Wermachtu czy chcioł czy ni. A jak się upiyroł to było wiadomo co za to groziło .Toż jak mój ujek yno dostoł kartka do stawiynio sie do Rybnika na posteronek to już wiedzioł ło co sie rozchodzi. Wszyjscy we familiji wiedzieli że jak sie tam nie stawi to szupoki tak godali na policyjo nimiecko przidom po Niego tak czy tak i weznom go jak niy po dobroci to siłom.Ujek chocioż sie upiyroł i zarzekoł ,że niy pudzie mamulka klarowali mu że musi to zrobić bo ynacy cołko familijo poślom do lagru . I tak to na sprzyk swoji woli moj ujek łostoł wojokiym nimieckim. Ale co to za wojok keryn myśli yno jak by tu uciyc, ni ma s niego wiela profitu z tom różnicom ,że żodyn nie wiedzioł co ujek kombinuje. Bez cołki czas szukoł okazji kero nadarzyła sie pryndzy niż myśloł. Moja starka rozprowiali że ujek dostoł bojowe zadani ..Posłali Go s jeszcze drugim wojokiym tyż Ślonzokiym na kraj lasa żeby rozeznoł teryn. Ujek jak yno poczuł sie trocha bezpieczny a boł pora kilometrow łod swoji kwatyry udowoł ,że niy umi strzimać bo dostoł  sraczki abo laksyry po naszymu i musi iś do krzokow. Kamrat nic niy podejrzywoł ło co ujkowi idzie poszoł naprzod myślonc ,że tyn go dogoni. Ujek citnoł w krzoki a potym wartko jak yno umioł krajym lasa przedżoł sie do pobliski wsi .Czy mu tam wto pomog czy ni tego nigdy nie zdradzioł ale ważne że na trzeci dziyń zjawioł sie w chałupie .Boł na tela szprytny ,że czakoł na momynt w kierym Mamulka bydzie sama ,żeby Ji sie pokozać .Wiedzioł ,że jak by go wtoś widzioł to mo przesrane jak to padajom a wtedy abo kulka w łeb abo lagier. Mamulka na poczontku zaczyna lamyncić..Potym coś poszepotali i poszli do łobory kaj były krowy. Łod tego czasu żodyn ani z familiji ani ze wsi nie widzieli ujka yno mamulka na wieczor jak już wszyjscy spali chodziła do łobory. Dycko kryła coś pod zopaskom. Za pora dni łod tego wydarzynio wczas rano cołko familijo stanyła na nogi. Jak jeszcze wszyjscy spali pod chałupa podjechała wojskowo landara .Narobili takigo butlu, że somsiedzi za gardiny zaglondali do łokiyn co sie to robi. Wojoki we nimieckich ancugach ze szupokami i psym wykludzili Łojcow ze chałpy i pedzieli że jak nie pokożom kaj dezyrter sie skroł to Jich rozstrzylajom. Ci zaczyni lamyntować i zarzekać sie, że nie widzieli ujaka łod czasu jak poszoł do wojska. Szupoki przekopali cołko chałupa i nic nie znodli. Poszli tyż do tej łobory. Pies niby chycioł trop .Stanoł wele krowy i zaczon szczekać .Ujek kieryn siedzioł we taki dziurze przikrytej deskami i słomom pod żłobym zaglondoł bez szpara. Miarkowoł ,że to je Jego łostatni momynt .Zaczon gorko rzykać a boł tak wylynkany że wypuścioł kota kieryn tam z nim społ. Tego kota mioł ujek za nojlepszego kamrata co mog se s nim i pogodać i pachalać miynki i ciepłe futerko .Wtedy jak te szupoki wleźli do tej łobory to chyba som Ponboczek miyszoł w tym palce.To Łon wachowoł ujka i sprawioł ,że kot wyskoczoł jak łoparzony i miałczonc jak by go ze skory łodziyrali citnoł za stodoła. Pies za nim .Szupoki uznali ,że ni majom tu już nic do szukanio. Tak to ujek przetwoł w tej dziurze- schowku do końca wojny . Co prowda twało to jeszcze rok ale na tym sie niy skończyło. Jak prziszli Ruscy ujek ło mało niy ślimtoł ze uciechy ,że tera to już bydzie mog sie pokozać. Nie wiedzioł borok co go czaka. Jak yno sie pokozoł Ruscy uznali Go za wroga. Skorali tak ,że wziyni Go na piyrszo linio frontu. Kozali klynknonć na kolana i pedzieli ,że jak mu sie nic niy stanie to go puszczom. Ujek bez cołki czas rzykoł a kulki gwizdały mu wele gowy jak jakiś wiater ale żodno go niy dopadła. Przeżoł front a po wojnie jak sie łożynioł mioł co rozprowiać swojim dzieckom. Te uznały Go za wojoka kerego nie tykajom sie kulki i łokropnie miały w zocy że mieli takigo Łojca .

Regina Sobik