Sodoma i Gomora

T - TATA

E- ELZA

F- FRIDA

S- SOMSIOD

BS-BABA SOMSIADA

A--ANTEK-

F- Tato! Tato! mom nowina Antek szuko żony.

T-Co tyn gołodupiec, tyn gizd zatracony.

E-Przeca ło tym lyniu już ze poł wsi godo,

no niy strzimja, powiym dziołchom sie podobo.!

T- Padej po dobroci chyba że mu pszajesz,

powiym yno tela, z fajnej miski sie niy najysz.

F- Pamiyntosz tatulku jak to z wami było,

jak żeś szoł ze zolyt to już sie widniło.

Ludzie Cie widzieli i wiela godali

żeście z mamom jeszcze przed ślubym lygali!

A skond jo się wziyna co?

T-Nie pyskuj smarkulu zawrzi ta jadaczka.

E-Jak jo was tak suchom to mje biere sraczka,

co do Antka to Łon i mje się podobo.

T-Ależ cerko bydźże mondro i gupot niy godej.

F-Jo mom swoji lata wydać bych sie chciała

mama w mojim wieku już dwie cery mjała.

E- Zrobia Fridzie na złoś z Antkiym sie umówia,

wezna krotko kiecka i parfin se kupia

szkuty zafarbia, gymba wypucuja,

Antek bydzie w saku ... już goronczka czuja.!

F- No! wiedziałach zołzo że coś kombinujesz

jak Antka łodbijesz na gymbie poczujesz !

niy pamiyntosz jak to było we tym łońskim roku

miałaś taaakoo ! śliwa toż przy samym łoku.

T-Wasza mamuliczka przewraco się w grobie

a i jo sie bez was znojda na kiyrchowie,

cicho mi tu zaroz bo za sia niy ryncza,

insi pijom piwsko a jo sie tu myncza .

S-Gowa pynko z wrzasku coż się tukej dzieje?

myśloł żech że dzioły somsiad pasym leje,

choć jo je ciyrpliwy to strzimać niy umia,

wiym że cery zmierzłe toć jo to rozumia,

ale zaroz haja, a ło co to idzie.?

T-Zawrzicie te dźwiyrze ... somsiad świadkiym bydzie

a skuli takigo synka łod stolorza,

co sie mioł wykształcić w mieście na masorza,

nie skończoł nauki robota go bodzie

zbamoncioł mi cery .

S-A to dzisiaj w modzie już jo coś wiym ło tym

przeżoł żech to samo ale ło tym potym,

za prośbom żech prziszoł niy wiem jak to pedzieć.

T-Prosto z mostu! Prosto z mostu.

S- Potrzebuja pniyndzy... dziołcha wywianować.

T-A kieroż to cera chce się Wom wydować?

S-Nie chce ale musi choć po ni niy widać ,

a i te piyniondze mogom mi sie przidać,

to do tej najmłodszej , geszyng mi zrobiła ...

gańba mje je trocha je gorzi niż źle .

kej tyn giz i chachor żynić sie niy chce.

T-A kieryn to ? znom co bajtla zbajstlowoł,

przecaś niy dlo niego swoja dziołcha chowoł,

Łona cicho tako i sie niy szlajała

i na co Ji prziszło... zawitkom łostała.

S-Jeszcze niy łostała !jeszcze łobejrzymy!

a tymu Antkowi po puklu wklupiymy,

jeszcze popamiynto kaj raki zimujom

a Ty wiysz ? co Twoji cery Ci szykujom .

T- Toć się przekonomy ło co tukej idzie.!

Hilda!, Elza !! domje Antek Łojcym bydzie.

F-A to mi nowina joch Ci niy pedziała,

za sztyry miesionce byda bajtla miała,

starzikiym łostaniesz toż sie raduj wiela

szykuj kasa Łojciec!

T-nie bydzie wesela !

S- To sie porobiło mój Ponboczku złoty !

zaroz po cołki wsi rozniesom sie ploty,

trza tymu zaradzić sprawa zatuszować,

kiej boli jak plynckiyrz nie chca sie sztresować .

T- Leko pedzieć ,gorzij zrobić.

S- Trza karlusa skludzić niech co i jak powiy,

ale moja staro ło tym sie niy dowiy,

bo by była haja, butel aż do nieba,

no i wielko gańba niy tego mi trzeba, pra

T-No ja!!

E-Eee! coż s was za chłopy jakiś pokryncone,

gupi jak sto kudeł bo niedorobione,

trza załatwić sprawa nie godać za wiela,

dać na zapowiedzi we prziszło niedziela.

I to jo Was mom uczyć.

S- Jak na zapowiedzi, z kierom? bo som dwie !

jak jedna tak drugo tego gizda chce .

E- cha .cha, cha ,cha wasza dziołcha jak na wczasach była

ze żonatym chopym pod krzym sie puściła,

a teraz na Antka zwalo.

S-A ,Ty skond wiysz ło tym ?

E- Sama się chwoliła!.

S-Miarkuj że sie trocha niy godej za wiela

jak mje chycom nerwy porzondnie Cie spiera .

E-Jo, jo, godom prowda klachow nie roznosza,

to wyście zaczyni ło szacunek prosza.

S-Co!! szacunek do Cia kej i Ty go ni mosz

i Łojcu pyskujesz i mje szpetnie godosz .

to tak niy wypado!.

E -A co niy wypado kej gupie godocie,

cudzej dziołsze wklupać rozumu ni mocie.

Podom Was do sondu .

S-Ty mje sondym się strasz jo na to za stary

przeca u nas we wsi som wiynksze chachary ,

jo spokojny człowiek, ale jak sie wkurza.!.

F- Zaroz wkurza,wkurza, pokoj trza zachować

a sprawa przemyśleć żeby niy żałować.

T- Dobrze godo Frida ,wadzić sie niy chcymy,

muszymy pogodać nim się pobijymy.

S- Dejcie jako halba sprawa łobgodomy

trza tu myśleć trzeźwo kej czasu niy momy ,

staro mje zabije jak sie ło tym dowiy.

T- Żodyn Ji niy powiy.

S- No to pyrsk ludkowie!!!.

BS- Dziyń dobry somsiedzi , je tukej mój stary.

E -A je, je, yno jakiś taki chory .

BS- Ja chyba łożarty

jak yno sie straca ze chałupy na kwila

tyn łożyrok leci gibko do Emila.

Już ci jo wiym po co? giździe zatracony!,

bier sie ale wartko gościa w doma momy.

S- Gościa?, no niy godej !,a po co przijechoł?.

BS-Prziwoz dwa pieszczonki i gorzoły tasia

pedzioł ,że się żyni bjere cera nasza.!

S- Bele momy ziyncia,bele momy ziyncia.

E- Ktoś na dźwiyrze klupie trza by mu łotworzyć.

F-A kogo tam niesie! ,zaczyno mje morzyć

toż leca do haźla ,Elza łotworz dźwiyrze.

E-Antek to żeś je Ty jo cie niy poznała

Frida skuli Ciebie w haźlu sie skowała.

Toż wywol dziubeczku ta kawa na ława

strasznie żech ciekawo jako Ty mosz sprawa ?

Ancug ,nowy binder ,kudły w brylantynie,

no teraz żyniaczka chłopie Cie nie minie !

A-Zawołej mi Frida, chcioł bych s niom pogodać .

E-Frida!!, Frida !!!! wyłaź wartko z tego klopa

jak Byś chciała Antka za swojigo chłopa .

…..Tako to mo szczyńści !

A.-Frida jo Ci pszaja nic na to niy moga

łostoń mojom babom.

T-Przewraco sie w grobie biydoczka nieboga ,

coż by tyż pedziała?, i co by zrobiła.?

E-A co! A nic, pobogosławiła .

T-.Toż i jo Wom młodym błogosławioł byda

a mom jakiś wyjści .. kiej to moja Frida.

Zowistny jo ni ma, wiela szczyńścio życza,

no i kupa dziecek kerych niy policza .

Niech żyjom młodzi ! Niech żyjom !Niech sie s nami napijom !.

Regina Sobik 

foto z internetu