Ślonsk to dziedzictwo naszych pokolyń
fabrykow grubow banchowow szoli
to zimia piyrwej sadzom zmazano
kierej starziki nasi tak pszoli
Tu je historio życiym pisano
i trza nom siły by jom flegować
nie wszystko stare szpetotom straszy
może tyż czasym łoczy radować
I chwała Tymu co wzion sie za to
niech młodzi łobejrzom jak piyrwej było
łostawiom auta siednom do szole
i sjadom na doł na gruba „Guido”
Abo se banom konsek przejadom
internet laptop łostawiom doma
to nic że czasy cołkiym inaksze
ło downych pogodo starzik czy oma
Muzea browary w mig se łobejrzom
transport darmowy tyż zapewniony
autobus bydzie czakoł na placu
a zresztom ło czym my tu godomy
Toż weź familijo i ruszej śladym
Zabytkow Techniki kierych tak wiela
Ruda Gliwice i insze miasta
czakajom na Cia w czyrwcowo niedziela
R.Sobik
Brak komentarzy:
Prześlij komentarz