Chciałabych Wom łopedzieć
historyjo tako kero zdarzo się jak by jedni padali yno w bojkach ale
się zdarzyła naprowda .Toż zaczna łod tego że zygor na banchowie
pokazywoł pionto po połedniu.Młody karlus we ancugu wysztrychniyty
jak dorsz na świynto morza przedeptywoł ze jednej szłapy na
drugo..Serce waliło mu jak młotym jak by chciało wyskoczyć i
polecieć pryndzy na spotkani ze swojom lipstom kerej karlus nigdy
nie widzioł .Bez łostatni rok jak boł we lazarecie była kimś
nojważniejszym we jego życiu.A to bez cufal A było to tak .Za pora
tydni jak już doszoł do sia po wypadku na grubie w lazarecie
chcioł zazwonić do taki dziołszki s kerom się spotkoł pora razy
i wytłumaczyć się czamu niy prziszoł na spotkani . Podeszoł do
telefonu keryn boł na siyni w lazarecie wciepoł piyniondze i
wykrynco nomer inszy jak mioł wykryncić Jak usłyszoł głos we
słuchawce to ło mało niy pod trupym .Bez kwila niy mog godać
.Jak już doszoł do sia przeprosioł za pomyłka a dziołcha kero
była po drugi stronie słuchawki zaśmioła się tak piyknie że
synkowi zrobiło się łokropnie ckliwie.Łod słowa do słowa
zgodali się że jeszcze zazwoniom do sia .Karlus dowiedzioł się
yno tela że dziołcha mo na miano Rołza. Bez cołko noc niy mog
spać bez przerwy słyszoł Ji cudny głos .Wczas rano niy mog się
doczkać kedy bydzie mog zazwonić. Po łobchodzie dochtorow
pokuśtykoł do telefonu .Trefioł w dziesiontaka bo dziołcha miało
wolne łod roboty . Jak się dowiedzioł Rołza robiyła we lazarecie
za salowo ale niy pedziała w kerym .Niy mogli się nagodać .Łod
tego czasu zwonili roz Łon do ni roz Łona do niego żeby żodyn
niy boł za fest stratny no bo telefony kosztujom a niy mieli jak to
młodzi za dużo piyniyndzy . Tak było bez cołki czas jak leżoł w
tym lazarecie .A teraz czakoł na te swoji szczyńści wylynkany jak
diobli .Co prowda nie wiedzioł jak wyglondo dziołszka ale pedziała
że mo kajś dwadziyścia piyńć lot a takim znakiym po kerym jom
pozno bydzie czerwono róża kero dziołcha miała trzimać w prawej
rynce a łon bydzie mioł gazeta .Jak tak stoł to na kwila zaparło
mu dech bo rychtyk szła ku nimu gryfno frelka .Miała we rynce
kwiotek ale niy była to róża a i dziołcha miała nojwyży
siedymnoście lot .Wtedy karlus przipomnioł se że kedyś chcioł
żeby Rołza mu przisłała swoja fotografio ale dziołcha pedziała
mu że jak Ji pszaje i myśli Ło ni poważnie to wyglond niy mo
znaczynio .Rołza pedziała mu jeszcze że jak by widzioł że je
zwyczajom dziołchom to by mog do ni przestać zwonić abo boł by s
niom jak to padajom s braku laku. Jak się spotkajom to bydzie
widzioł i wtedy podejmie decyzjo czy chce być s niom czy niy .Synek
przistoł na to ale czuł że to je ta s kerom chce iś baz życi
kero bydzie jego babom .Zamyśloł się borok i wtedy ujrzoł młodo
frelka kero szła ku nimu a ta gazeta kero miała być takim
znakiym rozpoznawczym wypadła mu s ronk .Ta gazeta to Trybuna
Robotniczo bo były to taki czasy że była jedynom gazetom kerom
berkmony czytali jak czakali s roboty na autobus .Dziołszka zrobiła
na nim taki wrażyni że zapomnioł ło bożym świecie. Była wysoko
i łokropnie gryfno .Łoczy jak niebo czorne włosy poczesane w
końśki łogon .Miała łobleczone szaty czerwone w czorne
kropki.Zatkało go bo wyglondała jak te aktorki s filmu .Ruszoł w
Ji strona ale nie doł se pozor że dziołcha niy mo róży we rynce
.Jak już byli kole siebie dziołcha wyszeptała -czekom na Cia mój
piykny karlusie - .Zrobioł jeszcze krok i ujrzoł że za tom frelkom
stoji baba kajś po szterdziestce trocha posiwiało. Na nogach miała
przideptane stare szczewiki a na mantlu keryn pamiyntoł chyba
piyrszo wojna światowo przipiynto róża . Dziołcha ta w czerwonych
szatach wartko łodeszła na drugo strona i straciła się za
dźwiyrzami kawiarni
Karlus niy wiedzioł co mo
zrobić .Chcioł się zapaś pod ziymia no bo niy chcioł zrobić za
bozna tej kero przed nim stoła a serce wyrywało się do tej kero
miała taki głos jak jego s telefonu. No ale coż mioł zrobić
Stanoł na baczność jak przistało na porzondnego karlusa choć w
pojstrzodku czuł łokropne rozczarowani i godo -Je żech berkmon
Francik i łokropnie je żech rod że mogli my się spotkać. Prosza
Pani na kawa .-Wtedy ta baba łośmioła się poklepała go po
ramiyniu i pado że je porzondnym człowiekiym i jak idzie ło te
spotkani to to boł taki krzest bojowy kerym mioł przejść. No bo
to ta gryfno frelka prosiła jom żeby przipiyna se róża do mantla
.Pedziała jeszcze że jak Francik zaprosi jom na kawa to mo mu
przekazać że Łona czeko na niego w kawiarni po drugi stronie
.Francik w piyrszej kwili zdymbioł bo niy mieściło mu się to w
pale że ta Rołza je takom szprytnom dziołchom i łobrazioł sie
ale yno troszka . Wyrwoł tej starszej babie ta czarwono róża i co
sił w giczalach polecioł do kawiarni .Nie twało wiela kajś po poł
roku łod tego spotkanio jak Francik oświadczoł sie Rołzie a po
roku było huczne weselisko .Nim to nastało trza było iś do łojcow
łod lipsty i poprosić ło rynka.Toż Francik wzion pod parza halba
dlo łojca a dlo mamulki pukiet kwiotkow a młodszym braciszkom łod
dziołchy tytka szklokow bo tak się przeca noleżało Zaś samej
Rołzie kupioł piykny pieszczonek ale niy tyn ze łodpustu ale taki
ze prawdziwego złota s piyknym czerwonym łokiym.Kudły natrzoł
brylantyną łoblyk se nojlepszy ancug jaki mioł a keryn se kupioł
za piyrszo wypłata na grubie i tak wyelegantowany zjawioł się u
swoji dziołszki .Łojcowie prziszłej Panny młodej s poczontku
udowali niby że to niy som radzi że stracom dziołcha i jeszcze niy
wiadomo za jakigo karlusa możno to bydzie niy dej Boże jak gizd
abo miglanc .Ale Francik tak ich przekonywoł że się zgodzili .No
ale trza było jeszcze jakoś dziołcha wywianować .Usuć pierzina i
kupić łoblyczki i jeszcze wiela inszych rzeczy kere sie przidajom
młodym.Jak już wszystko było naszykowane młodzi dali za
zapowiedzi a potym boł ślub.Francik i Rołza byli zgodnym
małżyństwym wychowali na porzondnych ludzi sztworo dziecek .A jak
była keroś rocznica Jich spotkanio to Francik dycko kupowoł swoji
babie piykno czerwono róża na pamiontka .Potym szli na szpacyr na
kawa do kawiarni w kerej piyrszy roz się widzieli w realu jak by to
dzisiaj pedzieli młodzi .My się dziwomy że tera je dużo młodych
kerzy się poznali bez internet i som szczynśliwym małżyństwym .A
.trza Wom jeszcze wiedzieć ż a że były to czasy kaj niy było
internetu ale boł za to telefon dziynki kerymu się zgodali .Żyli
dłogo i szczynśliwie .Szczynśliwie ja ale czy dłogo niy powiym bo
Ponboczek wzion Francika do Sia już pora lot tymu a Rołza tera
chodzi na kiyrchow niy yno we rocznica śmierci ale pamiynto tyż ło
rocznicy piyrszego spotkanio. Toż chocioż szłapy już niy te bo
straszliwie bolom ale jakoś się tam zakotłasi na tyn kiyrchow i
przinosi Franckowi róże taki piykne czerwone jak kiedyś dostowała
łod Niego .Bo stare mondre ludowe przisłowi godo że piyrszo miłoś
niy ruścieje a jak wtoś komuś pszaje i je mu pisany to ani śmierć
niy mo siły .a tyn interent to je taki fajny wynalazek ale trza se
dać pozor .No bo idzie tam szkryflać bele co a niy widzi się tej
drugi strony .No możno se jeszcze pogodać bez skeypa czy jak to
tam nazywajom .No ale jak się trefi na jakigo gizda co umi cyganić
i tak umi zbamoncić że szkoda godać .Potym sie pokazuje że
zamiast młodego karlusa je to stary dziad keryn chce dziołszka
wykorzystać .Ale i dziołszki tyż umiom zbałamucić chopa że
cołkiym zgupieje .No ale coż tak to już je i my na to nic niy
poradzymy.
R.Sobik
Brak komentarzy:
Prześlij komentarz