Pieśniczko śląska

Tu na tym Śląsku pod hołdami

tam kaj je moj rodzinny dom

mom taki mały konsek nieba

kaj nigdy już nie byda som

tu ze mnom je śląsko pieśniczka

kero tak piyknie w sercu gro

życi nom śpiywym rozweselo

kożdy jom przeca w duszy mo

Ref.......Pieśniczko śląska pieśniczko

szukosz korzyni ślad

lecisz z wiatrym po polu

i niesiesz echym w świat

Śpiywały ci kominy

płaczkami czornych sadz

śpiywały szyby grubow

bez tela tela lot

Chocioż nierowno los obdarzo

i nie łod razu szczyńści do

szczyńści trza umieć se wyśpiywać

bo kożdy go we sercu mo

nie mijej miejsc nigdy nie mijej

kaj się do śpiywu dusza rwie

świat bydzie lepszy i piykniejszy

kiedy tak śpiywać nom się chce

Ref...Pieśniczko śląska pieśniczko

Kiedy poradzić se nie idzie

i kiedy jest markotno źle

pieśniczka dycko nom pomoże

jak ta mamulka przi nas je

niech kożdy bajtel chop czy baba

skosztuje tego szczyńścia smak

kiedy nie trzeba nom tak wiela

toż zaśpiwejmy wszyscy tak

Ref.......Pieśniczko śląska pieśniczko

znodłaś korzyni ślad

spod czornych hołd kominow

leciałaś echym w świat

dzisiaj my Cie śpiywomy

na skrzidłach niesie ptok

je żeś radościom pszocim

 na wiela wiela lot 

R.Sobik

Piosenka muzyka i wykonanie  Roman Kostka do wiersza :   "Pieśniczko śląska"