Słońce troszka zaspane wylazło zza chmury . -Ło jo joj ! co jo widza Burek jeszcze spi we swoji budzie ciekawe co to sie stało .Musza spytać miesionczka jak mu przeszła nocka i czy to czasym nie łon musioł wahować gospodarstwa przed złymi ludziami. Jak mje doszły słuchy bezmało przedwczoraj jacyś gizdy wciepli do somsiada plastikowe flaszki i putnie po piwie a potym gospodorz łokropnie chalatoł ,że niy doś ,że mo robota we polu to jeszcze musi sraniać jakiś charpynci kiere mu wtoś po ćmoku ciepnoł na plac. Idom żniwa roboty mocka a tu jeszcze to. Słońce troszka zastarane zajrzało do kurnika . -Ku ,ku ,ryku !łodezwoł sie kokot chyba trocha zaspołech ku, ku, ryku! stować mi tu zaroz zapioł . Kury kiere do tej pory spały na grzyndzie łotworzyły jedno potym drugi łoko. -A co to za wrzaski poli sie czy co zagdakała Szarokrzidło kura. -Niy ale trza stować bo gospodyni bydzie miała dzisioj gości i trza ji upiyc kołocz toż potrzebne som jajca. Pobudzone piociym kokota kury slazły s grzyndy . -Ko, ko, ko, ko! a kaj je futer pszeca som my głodne zagdakały tak ,że łobudziły spioncego Burka. -Hau, hau, hau, przebrzidłe ptaszyska je żech strasznie niewyspany bo bez cołko noc wahowoł żech obyjścio kiedy wy smacznie se spały . -Kwa, kwa, kwa, łodezwała sie kaczka maszerujonc ze swojom gromadkom do kompieli we sadzawce na zegrodka . -Kożdy s nas mo coś … nie zdonrzyła zakwakać bo na plac wele stodoły wjechoł jakiś dziwny stwor. Co prowda na przodku mioł taki mały domek a ze zadku coś łokrongłego . Ni to beczka ni o ruła i żodyn ze gowiedzi niy widzioł czegoś takigo. Na plecach tego dziwnego stwora były jakiś szlałchy .Co to może być ? pytali się jedyn bez drugigo. We tym czasie stwor podjechoł do betonowego zbiornika we ziymi kaj gospodorz gromadzioł zmazano woda ze gospodarstwa. Nie twało długo jak człowiek kieryn wyloz s tego stwora chycioł gumowy szlałch i wsadzioł go do dziury tego zbiornika. No i zaczyno sie zrobioł sie taki butel a szlałch zaczon sie tak trzonś jakby sie dusioł. - Podziwejcie se plompie woda do swojigo brzucha zaszczekoł Burek, kieryn jako piyrszy oprzitommioł i polecioł we kierunku dziwnego stwora. Kwa, kwa, kwa łodezwała się kaczka kiero zapomniała ło porannym kompaniu .-Je żech ciekawo czy wytrzimie czy niy pynknie. -Spokojnie nic mu się niy stanie zaszczekoł we łodpowiedzi pies. Widziołech już coś takigo u somsiada. Burek łokiym szpeca podziwoł się na dziwnego stwora .-Widzicie ze zadku mo taki szkiełko i tam widać dokond siyngnie woda, kiero plompie tako maszyna co nazywo się plompa rozumicie? Jak już woda dondzie do szkiełka to człowiek zastawi plompa ,żeby brzuch stwora nie pynknoł. -Ale ty żeś je mondry łodezwoł się kokot. Hau, hau, hau nie taki rzeczy sie widziało ale wartko cofnicie się zaroz łodjyżdżo łodszczekoł Burek i zamerdoł łogonym. Miau, miau, miau, a kaj zawiezie ta zmazano woda ? zamiałczoł kot kieryn do tej pory siedzioł na płocie i kukoł na całe te zdarzyni. -Na Oczyszczalnia . - Na Oczyszczalnia ! a co to takigo możesz nom pedzieć łodezwała sie kaczka. - Ło tym wom porozprowiom kedy indzi zaszczekoł Burek i w te pyndy polecioł do swoji budy .
Regina Sobik
Brak komentarzy:
Prześlij komentarz