Jankowice moja wieś

Wczoraj miałach taki zdarzyni .A było to w Rybniku kaj żech przijechała do dochtora.

Trefioł mje taki gryfny panoczek a mioł tako kulka ze sitkiym na patyku.Dowo mi ta kulka pod som pysk a jo że niedowidza toż żech myślała że to je lizok.Łokropnie żech sie znerwowała

i prasłach mu taszkom w łeb żeby sie spamiyntoł.A łon mi na to że je dziynnikarzym i chce przeprowadzić sy mnom wywiad na tymat naszej miejscowości.kaj łona leży i tam taki pierdoły. No to jo sie dopiyro wkurzyła i chciałach mu dać drugi roz w łeb no bo przeca Jonkowice skond pochodza jeszcze nie leżom a stojom miyndzy Kwalowicami a Świyrklanami.A leżom u nas nieboszczyki na kiyrchowie i jeszcze wom powiym że te nieboszczyki nie dostanom plynckiyrzy na zadku bo szkody górnicze co chwila ich przeciepujom na inszo strona .Tyn panoczek boł tak upierdliwy że sie yno wypytywoł jak to u nas z gospodarkom wyglondo.Toż jo mu tyż pedziała że u nas gospodorzy jest tela że idzie ich policzyć na palcach jednej rynki .A jak przidzie do żniw to wrobel musi se klynknąć kejby se podziubać ziorek bo ci nasi gospodorze to łoni sie przełonaczyli na jakiś bizns biznesmynow czy jak tam.Łotwiyrajom rozmańte sklepy a synek łod Tilki to chcioł se łotworzyć sklep ze pokrowcami na cepy. Czujecie .A te wszystki stare rupieci i klamory łod gospodorzy zebrali we izbie we szkole i naszkryfali na dzwiyrzach Izba Regionalno.a tera sie aszom jaki łoni to majom zbiory.A wiycie jako momy szkoła A tako kero zamias dachu mo taki szałfynster jak we domu towarowym ,a zamias komina tako wielko ruła bez kiero widać cołki niebo .Padajom na to Obserwatorium Astronomiczne .Byłach se tam łobejrzeć bo kożdy godo że Twardowski siedzi na miesiączku a że jo jest trocha ślepo i niy wziynach breli toż żech gówno widziała .Jeszcze wom powiym że u nas je wszystko piyrsze No bo nasza młodzież łoblykała sie po nowymu podług nowej mody..A wiycie moda momy tako kejby pokozać swe wdziynki .Przicasne kiecki i bluski no i widać musi pympki.Nic tu rechtor nie pomoże łod tego boł łojciec matka .Ci to mieli prziwachować w co łoblyko sie jich dziatwa.A karlus mo we nosie nieroz i trzi załośniczki a na gowie czub jak tyka galoty jak trzi kapliczki .Kejby te dziecka wyglondały jak sie noleży Dyrektor kozoł uszyć ancugi na jedne kopyto .A wiycie panoczku na drogach momy łosfalt a przed kożdom chałupom jakiś Krziwoczynto czy Ciynkociynko czy jakoś tak a łosfalt to je pod sama fortka chyba za gorzoła bo niy wierza że gmina je tako bogato. Momy tyż u nas taki piykny zabytkowy kościoł .a dzwony jak zacznom dzwonić to narobiom tela butlu że pobudzom wszystkich i to nie je prowda jak kiedyś pokazywali w telewizorze że w Jonkowicach dopołednia ludzie śpiom A jakigo momy farorza ,niech wszystkim bydzie żol .Kożdy rok je u nas taki Bieg Walyntego i łon co rok przijyżdżo na czym inszym Roz to przijechoł nowiutyńkom landarom łod fojermanow możno wtoś dzwonioł że Studziynka gore abo co .No a jednym to ło mało to gały nie wylazły na wiyrch a gowy to sie im lotały jak na karasolu łod tej zowiści .No a trza Wom wiedzieć że tyn bieg Walyntego to je skuli tego żeby ludzie pamiyntali takigo ksiyndza kerego te łoszkliwe hachary Husyty zabiły we Studziynce . Bo łon wioz Nojświyntszy Sakramynt do położniczki,a boł taki mondry że go skroł we dymbowej dziupli.kej by go te gizdy niy znodły. Acha jeszcze tym panoczek sie mje pytoł po co żech przijechała do Rybnika że i u nas tyż som dochtory .Toż jo mu na to że nasz dochtor ni mog se poradzić i skierowoł mje do specjalisty. Kejbyście Wy wiedzieli jak ta medecyna poszła do przodku. Piyrwej dochtor kozoł mi sie mi seblyc a teraz pokozać yno jynzyk no ale jo se myśla że niy ma tymu winna ta medycyna yno jo już je staro i jak ida do dochtora to bych sie musiała cołko wybiglować .Aha zapomniałach Wom jeszcze pedzieć że tyn panoczek pytoł sie jeszcze jak u nas wyglondo transport .Toż jo mu na to że ludzie przeciapli sie na auta a wszystki fory i koła ludzie se dali do zegrodkow a jo przijechała autobusym .To łon mi na to że mje zaproszo do Poloneza. No to jo dostała takich hercklekotow i rombłach mu taszkom w łeb bo jo tego Polkoneza tańcowała kajś czterdzieści rokow nazot .To Łon mi wartko podziynkowoł i pedzioł że już mo doś i s takom babom nie bydzie godoł .Czujecie .A jo na koniec chca Wom pedzieć że te Jonkowice to nie je dziura zabito dechami A jak piyknie momy bez lato .Cołki zegrodki w kwieciu a przed chałpami pozamiatane .Piyrwej to były tu trzi chałupy na krziż a tera kaj sie yno podziwocie to same wille .Beztoż Ci co tam som na wiyrchu jak przijechali do nas to niy mogli sie nadziwać jako piykno je ta nasza wieś .Toż dali nom za to nagroda za najpiykniejszo miejscowość w wojewodztwie ślonskim A jo Was zaproszom do nas cojbyście sie przekonali że nie cygania yno godom prowda .

R.Sobik

                                                             foto Jankowicka Studzienka